KAS ಕನಸು ಕಾಣುತ್ತಿದ್ದ ಗರ್ಭಿಣಿ ಪ್ರಿಯಾಂಕಾ ದುರಂತ ಅಂತ್ಯ: ಕೋಲಾಳ ಕೆರೆಯಲ್ಲಿ ಸಿಕ್ತು ಶವ!

ಹಾಸನ/ತುಮಕೂರು: ಕೆಎಎಸ್‌ (KAS) ಅಧಿಕಾರಿಯಾಗಬೇಕೆಂಬ ದೊಡ್ಡ ಕನಸು ಕಂಡಿದ್ದ ಎರಡು ತಿಂಗಳ ಗರ್ಭಿಣಿ ಪ್ರಿಯಾಂಕಾ ಅವರ ನಾಪತ್ತೆ ಪ್ರಕರಣ ಇದೀಗ ಅತ್ಯಂತ ಭೀಕರ ಹಾಗೂ ನಿಗೂಢ ರೀತಿಯಲ್ಲಿ ಅಂತ್ಯಗೊಂಡಿದೆ. ಕಳೆದ ಸೆಪ್ಟೆಂಬರ್ 19ರ ರಾತ್ರಿ ಹೇಮಾವತಿ ನಾಲೆಗೆ ಜಿಗಿದು ನಾಪತ್ತೆಯಾಗಿದ್ದಾರೆ ಎನ್ನಲಾಗಿದ್ದ ಪ್ರಿಯಾಂಕಾ ಅವರ ಮೃತದೇಹ, ಬರೋಬ್ಬರಿ 11 ದಿನಗಳ ಸುದೀರ್ಘ ಶೋಧ ಕಾರ್ಯದ ಬಳಿಕ ತುಮಕೂರು ಜಿಲ್ಲೆಯ ತುರುವೇಕೆರೆ ತಾಲೂಕಿನ ಕೋಲಾಳ ಗ್ರಾಮದ ಕೆರೆಯಲ್ಲಿ ಪತ್ತೆಯಾಗಿದೆ.

ಹಾಸನ ಜಿಲ್ಲೆಯ ಚನ್ನರಾಯಪಟ್ಟಣ ತಾಲೂಕಿನ ಚಿಕ್ಕನಾಯಕನಹಳ್ಳಿ ಬಳಿ ಸೆಪ್ಟೆಂಬರ್ 19ರ ರಾತ್ರಿ ಪತಿ ರಾಜಶೇಖರ ಜೊತೆ ಬೈಕ್‌ನಲ್ಲಿ ಆಸ್ಪತ್ರೆಗೆ ತೆರಳುತ್ತಿದ್ದಾಗ ಪ್ರಿಯಾಂಕಾ ಏಕಾಏಕಿ ಹೇಮಾವತಿ ನಾಲೆಗೆ ಜಿಗಿದಿದ್ದರು ಎಂದು ಹೇಳಲಾಗಿತ್ತು. ವಿಷಯ ತಿಳಿಯುತ್ತಿದ್ದಂತೆಯೇ ನಾಲೆಯ ನೀರು ಸ್ಥಗಿತಗೊಳಿಸಿ, ಅಗ್ನಿಶಾಮಕ ಸಿಬ್ಬಂದಿ, ಪೊಲೀಸರು ಹಾಗೂ ಮುಳುಗುತಜ್ಞರು ಸುರಂಗ ಮತ್ತು ನಾಲೆಯಿಂದ ನೀರು ಹರಿಯುವ ಎಲ್ಲಾ ಕೆರೆಗಳಲ್ಲಿ ತೀವ್ರ ಶೋಧ ನಡೆಸಿದ್ದರು. ತುರುವೇಕೆರೆ ಹಾಗೂ ತಿಪಟೂರು ಭಾಗಗಳಲ್ಲಿ ಡ್ರೋನ್ ಕ್ಯಾಮೆರಾಗಳ ಮೂಲಕವೂ ಸುಳಿವು ಪಡೆಯಲು ಯತ್ನಿಸಲಾಗಿತ್ತು. ಅಂತಿಮವಾಗಿ ಕೋಲಾಳ ಕೆರೆಯಲ್ಲಿ ಪ್ರಿಯಾಂಕಾ ಶವ ತೇಲುತ್ತಿರುವುದು ಪತ್ತೆಯಾಗಿದೆ.

ಬಾಗೂರು ಗ್ರಾಮದ ಕೃಷ್ಣಸ್ವಾಮಿ ಮತ್ತು ಶೋಭ ದಂಪತಿಯ ಪುತ್ರಿಯಾದ ಪ್ರಿಯಾಂಕಾಗೆ 8 ತಿಂಗಳ ಹಿಂದಷ್ಟೇ ಕುರುವಂಕ ಗ್ರಾಮದ ರಾಜಶೇಖರ ಜೊತೆ ವಿವಾಹವಾಗಿತ್ತು. ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಸಿದ್ಧತೆ ನಡೆಸುತ್ತಿದ್ದ ಪ್ರಿಯಾಂಕಾ ಪ್ರಸ್ತುತ ಎರಡು ತಿಂಗಳ ಗರ್ಭಿಣಿಯಾಗಿದ್ದರು.

ಬಯಲಾಯ್ತು ಮುಚ್ಚಿಟ್ಟ 2ನೇ ಮದುವೆ ರಹಸ್ಯ!

ಪೋಷಕರ ಆರೋಪವನ್ನು ಸಂಪೂರ್ಣವಾಗಿ ತಳ್ಳಿಹಾಕಿರುವ ಪತಿ ರಾಜಶೇಖರ ಹಾಗೂ ಆತನ ಕುಟುಂಬಸ್ಥರು, ಪ್ರಿಯಾಂಕಾ ಕುಟುಂಬದ ವಿರುದ್ಧವೇ ಆಘಾತಕಾರಿ ವಿಚಾರಗಳನ್ನು ಬಿಚ್ಚಿಟ್ಟಿದ್ದಾರೆ:

ಹಿಂದಿನ ಮದುವೆ ಮುಚ್ಚಿಟ್ಟಿದ್ದ ಪೋಷಕರು: ಪ್ರಿಯಾಂಕಾಗೆ ಈಗಾಗಲೇ ಮೊದಲೇ ಒಂದು ಮದುವೆಯಾಗಿತ್ತು. ಈ ಕಹಿ ಸತ್ಯವನ್ನು ಮರೆಮಾಚಿ ನಮ್ಮೊಂದಿಗೆ ದ್ವಿತೀಯ ವಿವಾಹ ಮಾಡಿದ್ದಾರೆ.

ಕಲ್ಯಾಣ ಮಂಟಪಕ್ಕೇ ಬಂದಿದ್ದ ಮೊದಲ ಪತಿ: ರಾಜಶೇಖರ ಜೊತೆ ಮದುವೆ ನಡೆಯುತ್ತಿದ್ದ ದಿನವೇ ಪ್ರಿಯಾಂಕಾಳ ಮೊದಲ ಪತಿ ಪೊಲೀಸರೊಂದಿಗೆ ಕಲ್ಯಾಣ ಮಂಟಪಕ್ಕೆ ಬಂದಿದ್ದ. ಮಗಳು ಹಳೆಯ ಗಂಡನ ಜೊತೆ ಓಡಿಹೋಗಬಹುದು ಎಂಬ ಭೀತಿಯಿಂದ ಪೋಷಕರು ವಿಚಾರವನ್ನು ಒತ್ತಾಯಪೂರ್ವಕವಾಗಿ ಮುಚ್ಚಿಟ್ಟು ಮದುವೆ ಮುಗಿಸಿದ್ದರು.

ವಿಷ ನೀಡುವುದಾಗಿ ಬೆದರಿಕೆ: ಈ ಮದುವೆಗೆ ಪ್ರಿಯಾಂಕಾ ಒಪ್ಪದಿದ್ದಾಗ ಆಕೆಯ ತಂದೆ-ತಾಯಿ ವಿಷದ ಬಾಟಲಿ ಹಿಡಿದು ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಸಿ, ಬಲವಂತವಾಗಿ ರಾಜಶೇಖರ ಜೊತೆ ಮದುವೆ ಮಾಡಿಕೊಟ್ಟಿದ್ದರು ಎಂದು ಪತಿ ಕಡೆಯವರು ಪ್ರತ್ಯಾರೋಪ ಮಾಡಿದ್ದಾರೆ.

ಪೊಲೀಸ್ ತನಿಖೆಯಿಂದಷ್ಟೇ ಸತ್ಯ ಹೊರಬರಬೇಕಿದೆ:

ಮೃತ ಪ್ರಿಯಾಂಕಾಗೆ ಈಜು ಬರುತ್ತಿತ್ತು ಎಂಬ ಮಾಹಿತಿಯೂ ಹೊರಬಿದ್ದಿರುವುದರಿಂದ, ಆಕೆ ಆಕಸ್ಮಿಕವಾಗಿ ನಾಲೆಗೆ ಹಾರಿದಳೇ, ಆತ್ಮಹತ್ಯೆ ಮಾಡಿಕೊಂಡಳೇ ಅಥವಾ ಪತಿಯೇ ಕೊಲೆ ಮಾಡಿ ಎಸೆದಿದ್ದಾನೆಯೇ ಎಂಬ ಅನುಮಾನಗಳು ವ್ಯಕ್ತವಾಗಿವೆ.