ಇನ್‌ಸ್ಟಾಗ್ರಾಮ್ ಪ್ರೇಮ ವಿವಾಹ: ಯುವಕನ ಅರ್ಧ ತಲೆ ಬೋಳಿಸಿ, ಚಪ್ಪಲಿ ಹಾರ ಹಾಕಿ ಸಾರ್ವಜನಿಕವಾಗಿ ಅವಮಾನ!

ಹರ್ದೋಯ್ (ಉತ್ತರ ಪ್ರದೇಶ): ಇನ್‌ಸ್ಟಾಗ್ರಾಮ್‌ನಲ್ಲಿ ಶುರುವಾದ ಫ್ರೆಂಡ್ ರಿಕ್ವೆಸ್ಟ್ ಹಾಗೂ ಪ್ರೇಮ ಕಥೆಯೊಂದು ದೇವಸ್ಥಾನದ ಮದುವೆಯವರೆಗೂ ತಲುಪಿ, ಕೊನೆಗೆ ಕರಾಳ ದೌರ್ಜನ್ಯ ಮತ್ತು ಸಾರ್ವಜನಿಕ ಅವಮಾನದಲ್ಲಿ ಮುಕ್ತಾಯಗೊಂಡ ಘಟನೆ ಉತ್ತರ ಪ್ರದೇಶದ ಹರ್ದೋಯ್ ಜಿಲ್ಲೆಯ ಗಂಗ್‌ಪುರ ಗ್ರಾಮದಲ್ಲಿ ನಡೆದಿದೆ.

ಮೈನ್‌ಪುರಿ ಜಿಲ್ಲೆಯ ನಿವಾಸಿ ನರೇಂದ್ರ (37) ಎಂಬ ವ್ಯಕ್ತಿಯೇ ಈ ವಿಕೃತ ದೌರ್ಜನ್ಯಕ್ಕೆ ಒಳಗಾದ ದುರದೃಷ್ಟಕರ ಸಂತ್ರಸ್ತ.

ಘಟನೆಯ ವಿವರ ಹಾಗೂ ಹಿನ್ನೆಲೆ:

ಸಂತ್ರಸ್ತ ನರೇಂದ್ರ ತಿಳಿಸಿರುವಂತೆ, ಸುಮಾರು ಎರಡುವರೆ ವರ್ಷಗಳ ಹಿಂದೆ ಇನ್‌ಸ್ಟಾಗ್ರಾಮ್ ಮೂಲಕ ಅವರಿಗೆ ಸೋನಿಯಾ ಯಾದವ್ ಎಂಬಾಕೆಯ ಪರಿಚಯವಾಗಿತ್ತು. ಕೆಲವೇ ದಿನಗಳ ಮಾತುಕತೆಯ ನಂತರ ಕನ್ನೌಜ್‌ನ ಗೌರಿಘಾಟ್‌ನಲ್ಲಿ ಭೇಟಿಯಾದ ಇಬ್ಬರೂ ದೇವಸ್ಥಾನದಲ್ಲಿ ಮದುವೆಯಾಗಿದ್ದರು. ಕುಟುಂಬದವರ ವಿರೋಧದ ನಡುವೆಯೂ ಇಬ್ಬರೂ ಎರಡುವರೆ ವರ್ಷಗಳ ಕಾಲ ಜೊತೆಯಾಗಿ ವಾಸಿಸುತ್ತಿದ್ದರು.

ಆದರೆ, ದಿನಕಳೆದಂತೆ ಸೋನಿಯಾಳ ಹಿಂದಿನ ರಹಸ್ಯಗಳು ಬಯಲಾದವು. ಆಕೆಗೆ ಈ ಮುಂಚೆಯೇ ಎರಡು ಮದುವೆಗಳಾಗಿದ್ದು, ಮೊದಲ ಪತಿಯಿಂದ 3 ಮಕ್ಕಳು ಹಾಗೂ ಎರಡನೇ ಪತಿ ಮುನ್ನಾ ಯಾದವ್‌ನಿಂದ 6 ಮಕ್ಕಳು ಸೇರಿ ಒಟ್ಟು 9 ಮಕ್ಕಳಿದ್ದಾರೆ ಎಂಬ ವಿಚಾರ ನರೇಂದ್ರನಿಗೆ ತಿಳಿದುಬಂದಿದೆ.

ಗಲಾಟೆ ಮತ್ತು ವಿಕೃತ ಕೃತ್ಯ:

ಸೆಪ್ಟೆಂಬರ್ 25 ರಂದು ನರೇಂದ್ರ, ಸೋನಿಯಾಳನ್ನು ಭೇಟಿಯಾಗಲು ತೆರಳಿದ್ದಾಗ ಆಕೆಯ ಮೊಬೈಲ್ ಫೋನ್ ಪರಿಶೀಲಿಸಿದ್ದಾರೆ. ಈ ವೇಳೆ ಆಕೆ ನಾಲ್ಕನೇ ವ್ಯಕ್ತಿಯ ಜೊತೆಗೂ ಸಂಪರ್ಕದಲ್ಲಿರುವುದು ಕಂಡುಬಂದಿದೆ. ಇದರಿಂದ ಇಬ್ಬರ ನಡುವೆ ತೀವ್ರ ಗಲಾಟೆ ನಡೆದಿದ್ದು, 5 ತಿಂಗಳ ಗರ್ಭಪಾತದ ವಿಚಾರವಾಗಿಯೂ ಮಾತಿಗೆ ಮಾತು ಬೆಳೆದು ಆಕ್ರೋಶಗೊಂಡ ನರೇಂದ್ರ ಸೋನಿಯಾಗೆ ಕಪಾಳಮೋಕ್ಷ ಮಾಡಿದ್ದಾನೆ.

ಇದಾದ ನಂತರ, ಸೋನಿಯಾ ತಂತ್ರ ರೂಪಿಸಿ ಮಗುವನ್ನು ಕರೆದುಕೊಂಡು ಹೋಗುವ ನೆಪದಲ್ಲಿ ನರೇಂದ್ರನನ್ನು ಹರ್ದೋಯ್‌ನ ತನ್ನ ಗ್ರಾಮಕ್ಕೆ ಬರಹೇಳಿದ್ದಾಳೆ. ನರೇಂದ್ರ ಗ್ರಾಮ ತಲುಪುತ್ತಿದ್ದಂತೆಯೇ, ಸೋನಿಯಾ ಮತ್ತು ಆಕೆಯ ಎರಡನೇ ಪತಿ ಮುನ್ನಾ ಯಾದವ್ ಸೇರಿ ಆತನನ್ನು ಬಂಧಿಸಿ ಕಟ್ಟಿಹಾಕಿದ್ದಾರೆ.

ಕತ್ತರಿ ಮತ್ತು ರೇಜರ್ ಬಳಸಿ ನರೇಂದ್ರನ ಅರ್ಧ ತಲೆಯನ್ನು ಬೋಳಿಸಿ, ಅರ್ಧ ಮೀಸೆಯನ್ನು ಕತ್ತರಿಸಿಹಾಕಿದ್ದಾರೆ. ಅಷ್ಟೇ ಅಲ್ಲದೆ, ಕುತ್ತಿಗೆಗೆ ಚಪ್ಪಲಿ ಹಾರ ಹಾಕಿ ಗಂಟೆಗಟ್ಟಲೆ ದಿಗ್ಬಂಧನದಲ್ಲಿಟ್ಟು ತೀವ್ರವಾಗಿ ನಿಂದಿಸಿದ್ದಾರೆ. ಈ ವೇಳೆ ನರೇಂದ್ರ ಕೈಮುಗಿದು ಅಳುತ್ತಾ ಪ್ರಾಣಭಿಕ್ಷೆ ಬೇಡಿದರೂ, ಅಲ್ಲಿದ್ದ ಜನರು ಆತನಿಗೆ ನೆರವಾಗುವ ಬದಲು ವೀಡಿಯೊ ಚಿತ್ರೀಕರಿಸಿದ್ದಾರೆ.

ಪೊಲೀಸ್ ಕ್ರಮ:

ಈ ಘಟನೆಯ ಭೀಕರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ. ಹರ್ದೋಯ್ ಪೊಲೀಸ್ ಅಧಿಕಾರಿ ಹರ್‌ಪಾಲ್‌ಪುರ್ ವೃತ್ತ ನಿರೀಕ್ಷಕ ಪ್ರವೀಣ್ ಕುಮಾರ್ ಮಾತನಾಡಿ, “ಸಂತ್ರಸ್ತ ನರೇಂದ್ರ ನೀಡಿದ ದೂರಿನ ಆಧಾರದ ಮೇಲೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಹಣಕಾಸಿನ ವ್ಯವಹಾರ ಹಾಗೂ ವ್ಯಕ್ತಿಗತ ವೈಷಮ್ಯದಿಂದ ಈ ದೌರ್ಜನ್ಯ ನಡೆದಿದೆ. ಆರೋಪಿಗಳ ಬಂಧನಕ್ಕೆ ದಾಳಿ ನಡೆಸಲಾಗುತ್ತಿದ್ದು, ಕಾನೂನನ್ನು ಕೈಗೆತ್ತಿಕೊಳ್ಳುವವರ ವಿರುದ್ಧ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುವುದು” ಎಂದು ತಿಳಿಸಿದ್ದಾರೆ.