“ನನ್ನ ಕಣ್ಣೆದುರೇ ಮಗನ ಕುತ್ತಿಗೆ ಹಿಸುಕಿ, ಎದೆ ಮೇಲೆ ಹಾರಿ ಕೊಂದರು: ಅಡೋಬ್ ಟೆಕ್ಕಿ ವಿನಯ್ ಗುಪ್ತಾ ತಾಯಿ ಕಣ್ಣೀರು!

ನವದೆಹಲಿ: ದಾಂಪತ್ಯ ಕಲಹದ ಹಿನ್ನೆಲೆಯಲ್ಲಿ 31 ವರ್ಷದ ಸಾಫ್ಟ್‌ವೇರ್ ಎಂಜಿನಿಯರ್ ಹಾಗೂ ಅಡೋಬ್ ಸಂಸ್ಥೆಯ ಉದ್ಯೋಗಿ ವಿನಯ್ ಗುಪ್ತಾ ಅವರನ್ನು ಪತ್ನಿಯ ಕುಟುಂಬದ ಆರು ಮಂದಿ ಸೇರಿ ಹಲ್ಲೆ ನಡೆಸಿ ಹತ್ಯೆ ಮಾಡಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ದೆಹಲಿಯ ನಿಹಾಲ್ ವಿಹಾರ್‌ನಲ್ಲಿರುವ ಮನೆಯಲ್ಲಿ ಈ ಘಟನೆ ನಡೆದಿದೆ. ಅಡೋಬ್ ಟೆಕ್ಕಿ ವಿನಯ್ ಗುಪ್ತಾ  ತಾಯಿ ನನ್ನ ಎದುರೇ ಮಗನ ಕೊಂದು ಹಾಕಿದರು ಎಂದು ಕಣ್ಣೀರು ಹಾಕಿದ್ದಾರೆ. 

ವಿನಯ್ ಗುಪ್ತಾ ಅವರ ತಾಯಿ ಘಟನೆಯ ಭೀಕರ ಕ್ಷಣಗಳನ್ನು ವಿವರಿಸಿದ್ದು, ತಮ್ಮ ಕಣ್ಣೆದುರೇ ಮಗನ ಮೇಲೆ ಹಲ್ಲೆ ನಡೆಸಿ ಹತ್ಯೆ ಮಾಡಲಾಗಿದೆ ಎಂದು ಆರೋಪಿಸಿದ್ದಾರೆ.

“ಅವರು ಮನೆಗೆ ಬಂದಾಗ ಯಾವುದೇ ಸಮಸ್ಯೆ ಇಲ್ಲ ಎಂದು ಭಾವಿಸಿದ್ದೆವು. ಸಂಬಂಧಿಕರು ಬಂದಿದ್ದಾರೆ ಎಂದುಕೊಂಡು ನೀರು ನೀಡಲು ಹೋಗಿದ್ದೆ. ಆದರೆ ಕೆಲವೇ ಕ್ಷಣಗಳಲ್ಲಿ ಅವರು ನನ್ನ ಮಗನನ್ನು ಹಿಡಿದು ಹಾಸಿಗೆಯ ಮೇಲೆ ಕೆಡವಿ, ಕುತ್ತಿಗೆ ಹಿಡಿದು ಉಸಿರುಗಟ್ಟಿಸಿದರು. ಹೊಟ್ಟೆಗೆ ಒದ್ದರು, ಗುದ್ದಿದರು,” ಎಂದು ತಾಯಿ ಕಣ್ಣೀರಿಟ್ಟಿದ್ದಾರೆ.

ಮಗನನ್ನು ರಕ್ಷಿಸಲು ಮುಂದಾದಾಗ ಪತಿ ಹಾಗೂ ತಮಗೂ ಹಲ್ಲೆ ನಡೆಸಲಾಗಿದೆ ಎಂದು ಅವರು ಹೇಳಿದ್ದಾರೆ. ನೆರೆಹೊರೆಯವರು ಬರುವಷ್ಟರಲ್ಲಿ ದಾಳಿ ನಡೆಸಿದವರು ವಿನಯ್ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ್ದರು. ಆಸ್ಪತ್ರೆಗೆ ಕರೆದೊಯ್ಯುವ ಮಾರ್ಗದಲ್ಲೇ ವಿನಯ್ ಮೃತಪಟ್ಟಿದ್ದಾರೆ ಎಂದು ಕುಟುಂಬ ತಿಳಿಸಿದೆ.

ಪತ್ನಿಯ ಕುಟುಂಬದ ವಿರುದ್ಧ ಗಂಭೀರ ಆರೋಪ

ವಿನಯ್ ಮತ್ತು ಅವರ ಪತ್ನಿ ರೇಖಾ ಗುಪ್ತಾ ನಡುವೆ ಸಣ್ಣ ವಿಚಾರಕ್ಕೆ ಜಗಳ ನಡೆದ ಬಳಿಕ ರೇಖಾ ಮನೆಯಿಂದ ಹೊರಗೆ ಹೋಗಿದ್ದರು ಎನ್ನಲಾಗಿದೆ. ಬಳಿಕ ಕೆಲವೇ ನಿಮಿಷಗಳಲ್ಲಿ ತಮ್ಮ ಕುಟುಂಬದ ಆರು ಮಂದಿಯೊಂದಿಗೆ ವಾಪಸ್ ಬಂದಿದ್ದು, ಅವರು ವಿನಯ್ ಮೇಲೆ ದಾಳಿ ನಡೆಸಿದ್ದಾರೆ ಎಂದು ಕುಟುಂಬ ಆರೋಪಿಸಿದೆ.

ವಿನಯ್ ಅವರ ಸಹೋದರಿ ಕೂಡ ಇದು ಪೂರ್ವಯೋಜಿತ ದಾಳಿ ಎಂದು ಆರೋಪಿಸಿದ್ದಾರೆ. ಸುಮಾರು 30 ನಿಮಿಷಗಳ ದೂರದಲ್ಲಿರುವ ಸಂಬಂಧಿಕರು ಕೇವಲ 10 ನಿಮಿಷಗಳಲ್ಲಿ ಮನೆಗೆ ಹೇಗೆ ಬಂದರು ಎಂಬುದನ್ನು ಅವರು ಪ್ರಶ್ನಿಸಿದ್ದಾರೆ.

ದಾಳಿ ನಡೆಯುವ ಮುನ್ನ ಸಿಸಿಟಿವಿ ಕ್ಯಾಮೆರಾಗಳನ್ನು ಆಫ್ ಮಾಡಲಾಗಿತ್ತು ಎಂಬ ಆರೋಪವೂ ಕೇಳಿಬಂದಿದೆ. ಈ ಆರೋಪಗಳ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಐದು ನಿಮಿಷದಲ್ಲೇ ಎಲ್ಲವೂ ಮುಗಿಯಿತು: ತಾಯಿ

“ಅವರು ನನ್ನ ಮಗನ ಕೈಗಳನ್ನು ಹಿಡಿದು, ಕುತ್ತಿಗೆ ಹಿಸುಕಿ, ಎದೆ ಮೇಲೆ ಹಾರಿ ಹಲ್ಲೆ ನಡೆಸಿದರು. ನನ್ನ ಕಣ್ಣೆದುರೇ ಐದು ನಿಮಿಷಗಳಲ್ಲಿ ಎಲ್ಲವೂ ಮುಗಿದುಹೋಯಿತು,” ಎಂದು ವಿನಯ್ ಅವರ ತಾಯಿ ಅಳಲು ತೋಡಿಕೊಂಡಿದ್ದಾರೆ.

ವಿನಯ್ ಅವರ ತಂದೆ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದಾರೆ. ದಂಪತಿಗೆ ಕೆಲವೇ ತಿಂಗಳ ಹಿಂದೆ ಜನಿಸಿದ ಅವಳಿ ಮಕ್ಕಳು ಇದ್ದಾರೆ.

ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ನಾಲ್ವರನ್ನು ಬಂಧಿಸಿದ್ದಾರೆ. ಮತ್ತೊಬ್ಬ ಆರೋಪಿ ತಲೆಮರೆಸಿಕೊಂಡಿದ್ದು, ಆತನಿಗಾಗಿ ಶೋಧ ನಡೆಯುತ್ತಿದೆ. ವಿಧಿವಿಜ್ಞಾನ ತಂಡ ಸ್ಥಳ ಪರಿಶೀಲನೆ ನಡೆಸಿದ್ದು, ಘಟನೆಯ ನಿಖರ ಸರಣಿಯನ್ನು ಪೊಲೀಸರು ತನಿಖೆ ಮಾಡುತ್ತಿದ್ದಾರೆ.