24 ಗಂಟೆಯಲ್ಲಿ 1.6 ಲಕ್ಷ ಫಾಲೋವರ್ಸ್: ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದೆ ‘ದಿಮಾಗಿ ನಕ್ಸಲ್ ಪಾರ್ಟಿ’ ಇನ್‌ಸ್ಟಾಗ್ರಾಮ್ ಖಾತೆ!

ನವದೆಹಲಿ: ಇನ್‌ಸ್ಟಾಗ್ರಾಮ್‌ನಲ್ಲಿ ‘ದಿಮಾಗಿ ನಕ್ಸಲ್ ಪಾರ್ಟಿ’ ಎಂಬ ಹೆಸರಿನ ಖಾತೆಯೊಂದು ಹೊಸದಾಗಿ ತೆರೆದುಕೊಂಡಿದ್ದು, ಕೇವಲ 24 ಗಂಟೆಗಳಲ್ಲಿ 1.6 ಲಕ್ಷಕ್ಕೂ ಹೆಚ್ಚು ಫಾಲೋವರ್ಸ್‌ಗಳನ್ನು ಹೊಂದುವ ಮೂಲಕ ತೀವ್ರ ಕುತೂಹಲ ಮೂಡಿಸಿದೆ.

ಈ ಖಾತೆಯಲ್ಲಿ ಪ್ರಸ್ತುತ 62 ಪೋಸ್ಟ್‌ಗಳಿದ್ದು, 35 ಖಾತೆಗಳನ್ನು ಫಾಲೋ ಮಾಡಲಾಗುತ್ತಿದೆ. ಇನ್‌ಸ್ಟಾಗ್ರಾಮ್‌ ಮಾಹಿತಿ ಪ್ರಕಾರ, ಈ ಖಾತೆಯನ್ನು ಇದೇ ತಿಂಗಳು (ಆಗಸ್ಟ್ 2026) ಆರಂಭಿಸಲಾಗಿದ್ದು, ಖಾತೆಯ ಹೆಸರನ್ನು (Username) ಒಮ್ಮೆ ಬದಲಾಯಿಸಲಾಗಿದೆ. ಆದರೆ, ಈ ಖಾತೆಯನ್ನು ಯಾರು ನಿರ್ವಹಿಸುತ್ತಿದ್ದಾರೆ ಎಂಬ ವಿವರ ಲಭ್ಯವಾಗಿಲ್ಲ.

ಮೋದಿ ಭಾಷಣದ ಬೆನ್ನಲ್ಲೇ ವೈರಲ್:

ಇತ್ತೀಚೆಗೆ ನಡೆದ ಸ್ವಾತಂತ್ರ್ಯ ದಿನಾಚರಣೆಯ ಭಾಷಣದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು “ದಿಮಾಗಿ ನಕ್ಸಲ್” (ಬೌದ್ಧಿಕ ನಕ್ಸಲರು) ಎಂಬ ಪದವನ್ನು ಪ್ರಸ್ತಾಪಿಸಿದ್ದರು.

“ದೇಶದಲ್ಲಿ ಬಂದೂಕು ಹಿಡಿದ ಸಶಸ್ತ್ರ ನಕ್ಸಲರನ್ನು ನಿರ್ಮೂಲನೆ ಮಾಡುವಲ್ಲಿ ನಾವು ಯಶಸ್ವಿಯಾಗಿದ್ದೇವೆ. ಆದರೆ, ದಿಮಾಗಿ ನಕ್ಸಲರು ಇನ್ನೂ ಸಕ್ರಿಯರಾಗಿದ್ದು, ಸಂಚು ರೂಪಿಸುತ್ತಿದ್ದಾರೆ” ಎಂದು ಮೋದಿ ಹೇಳಿದ್ದರು. ಪ್ರಧಾನಿಯವರ ಈ ಹೇಳಿಕೆಯ ಬೆನ್ನಲ್ಲೇ ಈ ಹೆಸರಿನ ಇನ್‌ಸ್ಟಾಗ್ರಾಮ್ ಖಾತೆ ಸೃಷ್ಟಿಯಾಗಿ ಭಾರಿ ಸದ್ದು ಮಾಡುತ್ತಿದೆ.