ಸಹೋದರಿ ಚುಡಾಯಿಸಿದ್ದ 22 ವರ್ಷಗಳ ಹಗೆತನ: 2 ಬಾರಿ ಕೊಲೆ ಯತ್ನ ಫೇಲ್, ಮೂರನೇ ಬಾರಿ ಫಿನಿಶ್!

ನವದೆಹಲಿ: ಸಹೋದರಿಯನ್ನು ಛೇಡಿಸಿದನೆಂಬ 22 ವರ್ಷಗಳ ಹಳೆಯ ವೈಷಮ್ಯವನ್ನು ಮನಸ್ಸಿನಲ್ಲಿಟ್ಟುಕೊಂಡು, ಎರಡು ಬಾರಿ ಕೊಲೆ ಯತ್ನದಿಂದ ಬದುಕುಳಿದಿದ್ದ ವ್ಯಕ್ತಿಯೊಬ್ಬನನ್ನು ಕೊನೆಗೂ ಎಸ್‌ಯುವಿ (SUV) ವಾಹನದಿಂದ ಹರಿಸಿ ಭೀಕರವಾಗಿ ಹತ್ಯೆ ಮಾಡಲಾಗಿರುವ ಘಟನೆ ದೆಹಲಿಯ ರಹಿಣಿ ವಲಯದ ಕಂಝಾವಾಲಾ ಪ್ರದೇಶದಲ್ಲಿ ನಡೆದಿದೆ.

ವಾಯುವ್ಯ ದೆಹಲಿಯ ಮಾಜ್ರಾ ದಬಾಸ್ ನಿವಾಸಿ ದೀಪಕ್ ದಬಾಸ್ ಕೊಲೆಯಾದ ದುರ್ದೈವಿ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ದೆಹಲಿ ಪೊಲೀಸರು ಪ್ರಮುಖ ಸಂಚುಗಾರ 45 ವರ್ಷದ ಪವನ್ ಅಲಿಯಾಸ್ ಜಗಪಾಲ್ ದಬಾಸ್ ಸೇರಿದಂತೆ ಐವರು ಆರೋಪಿಗಳನ್ನು ಬಂಧಿಸಿದ್ದಾರೆ.

ಕೊಲೆಗೆ ನಡೆದ ಮೂರು ಹಂತಗಳ ಸಂಚು:

ಮೊದಲ ಯತ್ನ (ಗುಂಡಿನ ದಾಳಿ): ದೀಪಕ್‌ನ ಸಹೋದರನ ಮನೆಯ ಹೊರಗೆ ಅಪರಿಚಿತರಿಂದ ಗುಂಡಿನ ದಾಳಿ ನಡೆಸಲಾಗಿತ್ತು. ಆದರೆ ಈ ದಾಳಿಯಿಂದ ದೀಪಕ್ ಪಾರಾಗಿದ್ದನು.

ಎರಡನೇ ಯತ್ನ (ಜುಲೈ 2): ದೀಪಕ್ ಸ್ಕೂಟರ್‌ನಲ್ಲಿ ಹೋಗುತ್ತಿದ್ದಾಗ ಹ್ಯುಂಡೈ ಕಾರಿನಿಂದ ಉದ್ದೇಶಪೂರ್ವಕವಾಗಿ ಡಿಕ್ಕಿ ಹೊಡೆಸಲಾಗಿತ್ತು. ಇದನ್ನು ರಸ್ತೆ ಅಪಘಾತವೆಂದು ಬಿಂಬಿಸಲಾಗಿತ್ತು. ಈ ದಾಳಿಯಲ್ಲೂ ದೀಪಕ್ ಪ್ರಾಣಾಪಾಯದಿಂದ ಪಾರಾಗಿದ್ದನು.

ಮೂರನೇ ಯತ್ನ (ಜುಲೈ 16 – ಭೀಕರ ಹತ್ಯೆ): ಜುಲೈ 16 ರಂದು ಚಾಂದ್‌ಪುರ ಮಾಜ್ರಾ ರಸ್ತೆಯಲ್ಲಿ ದೀಪಕ್ ಚಲಾಯಿಸುತ್ತಿದ್ದ ಸ್ಕೂಟರ್‌ಗೆ ಕಪ್ಪು ಬಣ್ಣದ ಸ್ಕಾರ್ಪಿಯೋ ಎಸ್‌ಯುವಿಯಿಂದ ಡಿಕ್ಕಿ ಹೊಡೆಸಿ, ಆತನ ಮೇಲೆ ಕಾರನ್ನು ಹತ್ತಿಸಿ ಭೀಕರವಾಗಿ ಕೊಲೆ ಮಾಡಲಾಗಿದೆ.

ಪೊಲೀಸರ ತನಿಖೆಯ ವೇಳೆ ಇದು ಕೇವಲ ರಸ್ತೆ ಅಪಘಾತವಲ್ಲ, ಬದಲಿಗೆ ಕೃತ್ಯವೆಸಗಲು ಪಕ್ಕಾ ಸಂಚು ರೂಪಿಸಲಾಗಿದ್ದ ಹತ್ಯೆ ಎಂಬುದು ಬಯಲಾಗಿದೆ. ಪ್ರಕರಣದಲ್ಲಿ ಜುಲೈ 2ರ ಅಪಘಾತಕ್ಕೆ ಬಳಸಿದ್ದ ಕಾರು ಹಾಗೂ ಜುಲೈ 16ರ ಕೊಲೆಗೆ ಬಳಸಿದ್ದ ಎಸ್‌ಯುವಿ ವಾಹನಗಳನ್ನು ಪೊಲೀಸರು ಜಪ್ತಿ ಮಾಡಿದ್ದಾರೆ.