Shocking Case: 20 ವರ್ಷಗಳ ಕಾಲ ಪತ್ನಿಗೆ ಡ್ರಗ್ಸ್ ನೀಡಿ ಗ್ಯಾಂಗ್ ರೇಪ್ ಮಾಡಿಸಿದ ಗಂಡ!

ಲಂಡನ್: ಮಾನವ ಕುಲವೇ ತಲೆತಗ್ಗಿಸುವಂತಹ ಅತ್ಯಂತ ಆಘಾತಕಾರಿ ಮತ್ತು ಕ್ರೂರ ಘಟನೆಯೊಂದು ಯುನೈಟೆಡ್ ಕಿಂಗ್‌ಡಮ್‌ನ (UK) ಗ್ರೇಟರ್ ಮ್ಯಾಂಚೆಸ್ಟರ್‌ನಲ್ಲಿ ಬೆಳಕಿಗೆ ಬಂದಿದೆ. ತನ್ನ ಸ್ವಂತ ಪತ್ನಿಗೆ ಸುಮಾರು 20 ವರ್ಷಗಳ ಕಾಲ ನಿರಂತರವಾಗಿ ಮಾದಕ ದ್ರವ್ಯ (ಡ್ರಗ್ಸ್) ನೀಡಿ, ಆಕೆ ಪ್ರಜ್ಞೆ ತಪ್ಪಿದಾಗ ಇತರ 13 ಜನ ಕಾಮುಕರೊಂದಿಗೆ ಸೇರಿ ಅತ್ಯಾಚಾರ ಎಸಗಿದ ದಾರುಣ ಪ್ರಕರಣ ನ್ಯಾಯಾಲಯದ ಮೆಟ್ಟಿಲೇರಿದೆ.

20 ವರ್ಷಗಳ ಕಾಲ ನಡೆದ ದೌರ್ಜನ್ಯ:

ಸದ್ಯ 60 ವರ್ಷ ಪ್ರಾಯದ ಪ್ರಮುಖ ಆರೋಪಿಯಾದ ಪತಿ, 2004 ರಿಂದ 2025 ರ ಅವಧಿಯಲ್ಲಿ ತನ್ನ ಪತ್ನಿಯ ಮೇಲೆ ನಿರಂತರವಾಗಿ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ ಎಂದು ಪ್ರಾಸಿಕ್ಯೂಟರ್‌ಗಳು ಆರೋಪಿಸಿದ್ದಾರೆ. ಅಷ್ಟೇ ಅಲ್ಲದೆ, 2018 ರಿಂದ 2025 ರ ನಡುವೆ ಇತರ ಪುರುಷರನ್ನು ಮನೆಗೆ ಆಹ್ವಾನಿಸಿ, ಪತ್ನಿ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದಾಗ ಆಕೆಯ ಮೇಲೆ ಅತ್ಯಾಚಾರ ಎಸಗಲು ಸಂಚು ರೂಪಿಸಿದ್ದ ಎನ್ನಲಾಗಿದೆ. ಪೀಡಿತ ಮಹಿಳೆಯ ಗುರುತನ್ನು ಗೌಪ್ಯವಾಗಿಡಲು ಆರೋಪಿ ಪತಿಯ ಹೆಸರನ್ನು ನ್ಯಾಯಾಲಯ ಬಹಿರಂಗಪಡಿಸಿಲ್ಲ.

ಆರೋಪಿಗಳ ಪಟ್ಟಿ ಬಹಿರಂಗ:

ನ್ಯಾಯಾಲಯವು ಮಾಧ್ಯಮ ನಿರ್ಬಂಧಗಳನ್ನು ತೆರವುಗೊಳಿಸಿದ ನಂತರ ಈ ಪ್ರಕರಣದಲ್ಲಿ ಭಾಗಿಯಾಗಿರುವ ಇತರ 13 ಆರೋಪಿಗಳ ವಿವರಗಳು ಸಾರ್ವಜನಿಕವಾಗಿವೆ. ಇವರ ವಯಸ್ಸು 28 ರಿಂದ 73 ವರ್ಷಗಳಾಗಿದ್ದು, ಇವರಲ್ಲಿ ಹಿರಿಯ ಪ್ಯಾರಾಮೆಡಿಕ್ ಸಿಬ್ಬಂದಿ, ಟ್ಯಾಕ್ಸಿ ಡ್ರೈವರ್, ಫುಟ್‌ಬಾಲ್ ಕೋಚ್, ಮತ್ತು ಮಾಜಿ ಫುಟ್‌ಬಾಲ್ ಕ್ಲಬ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಂತಹ ಪ್ರಭಾವಿ ವೃತ್ತಿಪರರು ಸೇರಿದ್ದಾರೆ.

ತಪ್ಪೊಪ್ಪಿಕೊಂಡ ಪತಿ ಮತ್ತು ಸಹಚರ:

ಮುಖ್ಯ ಆರೋಪಿಯಾದ ಪತಿ ಈಗಾಗಲೇ ರೇಪ್ ಮತ್ತು ಲೈಂಗಿಕ ದೌರ್ಜನ್ಯ ಸೇರಿದಂತೆ 15 ಅಪರಾಧಗಳನ್ನು ಒಪ್ಪಿಕೊಂಡಿದ್ದಾನೆ, ಆದರೆ ಇತರ 33 ಆರೋಪಗಳನ್ನು ನಿರಾಕರಿಸಿದ್ದಾನೆ. ಹಾಗೆಯೇ ಕಿತ್ ಫೋದರಿಂಗ್ಹ್ಯಾಮ್ (59) ಎಂಬ ಮತ್ತೊಬ್ಬ ತಂತ್ರಜ್ಞ ಆರೋಪಿ ಕೂಡ ತನ್ನ ಮೇಲಿನ ಎಲ್ಲಾ ಸಂಚು ಮತ್ತು ಅತ್ಯಾಚಾರದ ಆರೋಪಗಳನ್ನು ಒಪ್ಪಿಕೊಂಡಿದ್ದು, ಆತನನ್ನು ಕಸ್ಟಡಿಗೆ ಪಡೆಯಲಾಗಿದೆ.

ಉಳಿದ 12 ಆರೋಪಿಗಳು ತಮ್ಮ ಮೇಲಿನ ಆರೋಪಗಳನ್ನು ನಿರಾಕರಿಸಿದ್ದು, ಐದು ಜನರಿಗೆ ಜಾಮೀನು ದೊರೆತಿದೆ. ಈ ಘೋರ ಕೃತ್ಯದ ಸಂಪೂರ್ಣ ವಿಚಾರಣೆಯು ಮುಂಬರುವ ಸೆಪ್ಟೆಂಬರ್ ತಿಂಗಳಿನಲ್ಲಿ ಮ್ಯಾಂಚೆಸ್ಟರ್‌ನ ಮಿನ್‌ಶುಲ್ ಸ್ಟ್ರೀಟ್ ಕ್ರೌನ್ ಕೋರ್ಟ್‌ನಲ್ಲಿ ಆರಂಭವಾಗಲಿದೆ.