ಜೈಲು ವಾಸ ಮತ್ತು ರಾಜಕೀಯ ಮರುಜನ್ಮ, 2016ರ ಚೆಸ್ ಮತ್ತು ಫುಟ್‌ಬಾಲ್ ಆಟ: ಹೈಕಮಾಂಡ್ ಹಾದಿ ಸವೆಸಿ ಮುಖ್ಯಮಂತ್ರಿ ಗದ್ದುಗೆವರೆಗಿನ ಡಿ.ಕೆ. ಶಿವಕುಮಾರ್ ಹಾದಿಯೇ ರೋಚಕ!

ಬೆಂಗಳೂರು: ಕರ್ನಾಟಕದ ನೂತನ ಮುಖ್ಯಮಂತ್ರಿಯಾಗಿ ಡಿ.ಕೆ. ಶಿವಕುಮಾರ್ ಅವರು ಅಧಿಕಾರ ಸ್ವೀಕರಿಸಲು ಸಜ್ಜಾಗುತ್ತಿದ್ದಂತೆ, ರಾಜ್ಯ ಕಾಂಗ್ರೆಸ್‌ನಲ್ಲಿ ದಶಕಕ್ಕೂ ಹೆಚ್ಚು ಕಾಲ ನಡೆದ ಸಿದ್ದರಾಮಯ್ಯ ಹಾಗೂ ಡಿ.ಕೆ. ಶಿವಕುಮಾರ್ ನಡುವಿನ ರಾಜಕೀಯ ಜಿದ್ದಾಜಿದ್ದಿನ ಇತಿಹಾಸ ಮತ್ತೆ ಮುನ್ನೆಲೆಗೆ ಬಂದಿದೆ.

2016ರಲ್ಲಿ ಕೈತಪ್ಪಿದ್ದ ಕೆಪಿಸಿಸಿ ಅಧ್ಯಕ್ಷ ಗಾದಿಯಿಂದ ಹಿಡಿದು ಇಂದು ರಾಜ್ಯದ ಅತ್ಯುನ್ನತ ಹುದ್ದೆಯವರೆಗೆ ಡಿ.ಕೆ. ಶಿವಕುಮಾರ್ ನಡೆದು ಬಂದ ಹಾದಿ ತೀವ್ರ ರಾಜಕೀಯ ಹೋರಾಟದಿಂದ ಕೂಡಿದೆ.

2016ರ ಚೆಸ್ ಮತ್ತು ಫುಟ್‌ಬಾಲ್ ಆಟ:

2016ರಲ್ಲಿ ಅಂದಿನ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು ಡಿ.ಕೆ. ಶಿವಕುಮಾರ್ ಅವರಿಗೆ ಕೆಪಿಸಿಸಿ ಸಾರಥ್ಯ ವಹಿಸಲು ಆಫರ್ ನೀಡಿದ್ದರು. ಆದರೆ ಡಿ.ಕೆ.ಎಸ್ ವಿದೇಶ ಪ್ರವಾಸದಲ್ಲಿದ್ದ ಒಂದು ತಿಂಗಳ ಅವಧಿಯಲ್ಲಿ, ಸಿದ್ದರಾಮಯ್ಯ ಅವರು ಪಕ್ಷದೊಳಗೆ ತೀವ್ರ ರಾಜಕೀಯ ತಂತ್ರ ಹೂಡಿ ಶಿವಕುಮಾರ್ ಹಾದಿಗೆ ತಡೆಯೊಡ್ಡಿದ್ದರು. ಅಂದು ಹೈಕಮಾಂಡ್ ಅಭಿಪ್ರಾಯ ಕೇಳಿದ 16 ಸಚಿವರಲ್ಲಿ ಕೇವಲ ರೋಷನ್ ಬೇಗ್ ಮಾತ್ರ ಡಿ.ಕೆ.ಎಸ್ ಬೆಂಬಲಕ್ಕೆ ನಿಂತಿದ್ದರು. ಈ ಘಟನೆಯನ್ನು ಸ್ವತಃ ಶಿವಕುಮಾರ್ ಅವರು, “ನಾನು ಚೆಸ್ ಆಡಲು ಯತ್ನಿಸಿದೆ, ಆದರೆ ಸಿದ್ದರಾಮಯ್ಯ ಫುಟ್‌ಬಾಲ್ ಆಡಿದರು” ಎಂದು ಮಾರ್ಮಿಕವಾಗಿ ಬಣ್ಣಿಸಿದ್ದರು.

2013ರ ಸಚಿವ ಸಂಪುಟದಿಂದ ದೂರ:

ಈ ಇಬ್ಬರು ನಾಯಕರ ನಡುವಿನ ಶೀತಲ ಸಮರ 2013ರಲ್ಲೇ ಆರಂಭವಾಗಿತ್ತು. ಗಣಿಗಾರಿಕೆ ಮತ್ತು ಭೂ ಹಗರಣಗಳ ಆರೋಪ ಎದುರಿಸುತ್ತಿದ್ದ ಡಿ.ಕೆ. ಶಿವಕುಮಾರ್ ಅವರನ್ನು ತಮ್ಮ ಸಂಪುಟಕ್ಕೆ ಸೇರಿಸಿಕೊಳ್ಳಲು ಅಂದಿನ ಸಿಎಂ ಸಿದ್ದರಾಮಯ್ಯ ನಿರಾಕರಿಸಿದ್ದರು. ಆದರೆ ಹೈಕಮಾಂಡ್ ಮಟ್ಟದಲ್ಲಿ ತೀವ್ರ ಒತ್ತಡ ತಂದ ಶಿವಕುಮಾರ್ 2014ರ ಜನವರಿಯಲ್ಲಿ ಸಚಿವರಾಗುವಲ್ಲಿ ಯಶಸ್ವಿಯಾಗಿದ್ದರು.

ಜೈಲು ವಾಸ ಮತ್ತು ರಾಜಕೀಯ ಮರುಜನ್ಮ:

2019ರಲ್ಲಿ ಜಾರಿ ನಿರ್ದೇಶನಾಲಯದಿಂದ (ED) ಬಂಧನಕ್ಕೊಳಗಾಗಿ ದೆಹಲಿಯ ತಿಹಾರ್ ಜೈಲು ಸೇರಿದ್ದ ಡಿ.ಕೆ. ಶಿವಕುಮಾರ್ ಅವರಿಗೆ ಸೋನಿಯಾ ಗಾಂಧಿ ಅವರು ಜೈಲಿಗೆ ಭೇಟಿ ನೀಡಿ ಬೆಂಬಲ ಸೂಚಿಸಿದ್ದು ಅವರ ರಾಜಕೀಯ ಜೀವನದ ದೊಡ್ಡ ತಿರುವಾಯಿತು. ಜೈಲಿನಿಂದ ಜಾಮೀನಿನ ಮೇಲೆ ಹೊರಬಂದ ನಂತರ ಒಕ್ಕಲಿಗ ಸಮುದಾಯ ಹಾಗೂ ಪಕ್ಷದೊಳಗೆ ಅವರ ಪರ ಭಾರಿ ಅನುಕಂಪದ ಅಲೆ ಸೃಷ್ಟಿಯಾಯಿತು.

ಪಕ್ಷ ಸಂಘಟನೆ ಮತ್ತು ಯಶಸ್ಸು:

ಜುಲೈ 2, 2020 ರಂದು ಕೆಪಿಸಿಸಿ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ಡಿ.ಕೆ. ಶಿವಕುಮಾರ್, ತಳಮಟ್ಟದಿಂದ ಪಕ್ಷವನ್ನು ಮರುಸಂಘಟಿಸಿದರು. ಇವರ ಸಾಂಸ್ಥಿಕ ಚಾತುರ್ಯದ ಫಲವಾಗಿ 2023ರ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್ ಭರ್ಜರಿ ಬಹುಮತದೊಂದಿಗೆ ಅಧಿಕಾರಕ್ಕೆ ಬಂದಿತು. ಅಂದು ಬಿತ್ತಿದ ಸಂಘಟನೆಯ ಬೀಜ ಇಂದು ಅವರನ್ನು ಮುಖ್ಯಮಂತ್ರಿ ಕುರ್ಚಿಯವರೆಗೆ ತಂದು ನಿಲ್ಲಿಸಿದೆ.