Telegramನಲ್ಲಿ NEET ನಕಲಿ ಜಾಲ: ರಹಸ್ಯ ಕೋಚಿಂಗ್, ಕೈಬರಹದ ಪ್ರಶ್ನೆ ಪತ್ರಿಕೆ ಮಾರಿ ಕೋಟಿ ಕೋಟಿ ಲೂಟಿ!

ನವದೆಹಲಿ: “100 ಪ್ರತಿಶತ ಒರಿಜಿನಲ್ ಪೇಪರ್”.  ಇದು ಪ್ರಸ್ತುತ ಮೆಸೆಂಜಿಂಗ್ ಆ್ಯಪ್ ಟೆಲಿಗ್ರಾಂ (Telegram) ಗ್ರೂಪ್‌ಗಳಲ್ಲಿ ಎಗ್ಗಿಲ್ಲದೆ ಹರಿದಾಡುತ್ತಿರುವ ಆಮಿಷದ ಸಂದೇಶ. ವೈದ್ಯಕೀಯ ಪ್ರವೇಶ ಪರೀಕ್ಷೆಯಾದ NEET 2026ರ ಪ್ರಶ್ನೆ ಪತ್ರಿಕೆ ಸೋರಿಕೆ ಹಗರಣದ ತನಿಖೆಯನ್ನು ಕೈಗೆತ್ತಿಕೊಂಡಿರುವ ಸಿಬಿಐ (CBI) ಅಧಿಕಾರಿಗಳು, ಇದರ ಹಿಂದೆ ದೇಶವ್ಯಾಪಿ ಹರಡಿರುವ ಬೃಹತ್ ಜಾಲ ಹಾಗೂ ಟೆಲಿಗ್ರಾಂ ಮಾಫಿಯಾವನ್ನು ಬಯಲಿಗೆಳೆದಿದ್ದಾರೆ.

ಟೆಲಿಗ್ರಾಂನಲ್ಲಿ ನಕಲಿ ದಂಧೆಯ ಅಬ್ಬರ:

NEET ಪರೀಕ್ಷೆಗೂ ಕೆಲ ದಿನಗಳ ಮುಂಚೆಯೇ “ಕನ್ಫರ್ಮ್ಡ್ ಸೆಟ್” ಹಾಗೂ “ಡೈರೆಕ್ಟ್ ಆಕ್ಸೆಸ್” ಹೆಸರಿನಲ್ಲಿ ಖಾಸಗಿ ಟೆಲಿಗ್ರಾಂ ಗ್ರೂಪ್‌ಗಳಲ್ಲಿ ಹತ್ತಾರು ಆಫರ್‌ಗಳನ್ನು ನೀಡಲಾಗುತ್ತಿತ್ತು. ನಂಬಿಕೆ ಹುಟ್ಟಿಸಲು ನಕಲಿ ಯುಪಿಐ (UPI) ಪೇಮೆಂಟ್ ಸ್ಕ್ರೀನ್‌ಶಾಟ್‌ಗಳು ಮತ್ತು ನಕಲಿ ಚಾಟ್‌ಗಳನ್ನು ಗ್ರೂಪ್‌ಗಳಲ್ಲಿ ಸರಣಿಯಾಗಿ ಹಂಚಿಕೊಳ್ಳಲಾಗುತ್ತಿತ್ತು. ಅಷ್ಟೇ ಅಲ್ಲದೆ, ಬೇರೆ ಗ್ರೂಪ್‌ಗಳವರೆಲ್ಲಾ ವಂಚಕರು, ನಮ್ಮ ಬಳಿ ಮಾತ್ರವೇ ಅಸಲಿ ಪೇಪರ್ ಇದೆ ಎಂದು ಆತಂಕದಲ್ಲಿರುವ ಪೋಷಕರು ಮತ್ತು ವಿದ್ಯಾರ್ಥಿಗಳನ್ನು ನಂಬಿಸಿ ಲಕ್ಷಾಂತರ ರೂಪಾಯಿ ಹಣ ವಸೂಲಿ ಮಾಡಲಾಗುತ್ತಿತ್ತು.

ಕೈಬರಹದ ನೋಟ್ಸ್ ಮತ್ತು ರಹಸ್ಯ ತರಗತಿಗಳು:

ಸಿಬಿಐ ಅಧಿಕಾರಿಗಳ ತನಿಖೆಯ ಪ್ರಕಾರ, ಈ ಜಾಲವು ಅತ್ಯಂತ ರಹಸ್ಯವಾಗಿ ಕಾರ್ಯಾಚರಣೆ ನಡೆಸುತ್ತಿತ್ತು. ಇತ್ತೀಚೆಗೆ ಬಂಧಿತನಾದ ಪ್ರಮುಖ ಆರೋಪಿ, ಪುಣೆಯ ಕೆಮಿಸ್ಟ್ರಿ ಉಪನ್ಯಾಸಕ ಪಿ.ವಿ. ಕುಲಕರ್ಣಿ ಮತ್ತು ಲಾತೂರ್‌ನ ಪ್ರಮುಖ ಕೋಚಿಂಗ್ ಸಂಸ್ಥೆಯಾದ RCCಯ ಮುಖ್ಯಸ್ಥ ಶಿವರಾಜ್ ಮೊಟೇಗಾಂಕರ್ ಸೇರಿ ವಿದ್ಯಾರ್ಥಿಗಳಿಗೆ ರಹಸ್ಯ ತರಗತಿಗಳನ್ನು ನಡೆಸುತ್ತಿದ್ದರು. ಅಲ್ಲಿ ಮೊಬೈಲ್ ಅಥವಾ ಪ್ರಿಂಟ್ ಪೇಪರ್ ನೀಡುವ ಬದಲಾಗಿ, ಪ್ರಶ್ನೆ ಮತ್ತು ಉತ್ತರಗಳನ್ನು ವಿದ್ಯಾರ್ಥಿಗಳಿಗೆ ಕೈಬರಹದಲ್ಲಿ ಬರೆಸಲಾಗುತ್ತಿತ್ತು. ಸಿಬಿಐ ವಶಪಡಿಸಿಕೊಂಡ ಈ ಕೈಬರಹದ ನೋಟ್ಸ್‌ಗಳು ಮತ್ತು ಅಸಲಿ NEET ರಸಾಯನಶಾಸ್ತ್ರ (Chemistry) ಪ್ರಶ್ನೆ ಪತ್ರಿಕೆ ಸಂಪೂರ್ಣವಾಗಿ ತಾಳೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ತನಿಖೆಗೆ ಸವಾಲಾದ ತಂತ್ರಜ್ಞಾನ:

ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ (NTA) ಈ ಟೆಲಿಗ್ರಾಂ ಗ್ರೂಪ್‌ಗಳ ಕ್ಲೈಮ್‌ಗಳು ನಕಲಿ ಎಂದು ಹೇಳಿದ್ದರೂ, ಇಂತಹ ಜಾಲಗಳನ್ನು ಪತ್ತೆ ಹಚ್ಚುವುದು ಪೊಲೀಸರಿಗೆ ತಲೆನೋವಾಗಿದೆ. ಆರೋಪಿಗಳು ವಿಪಿಎನ್ (VPN) ತಂತ್ರಜ್ಞಾನ ಬಳಸುತ್ತಿರುವುದರಿಂದ ಮತ್ತು ಟೆಲಿಗ್ರಾಂ ಎನ್‌ಕ್ರಿಪ್ಟ್ ಆಗಿರುವುದರಿಂದ ಇವರ ಮೂಲ ಪತ್ತೆ ಹಚ್ಚಲು ತಂತ್ರಜ್ಞಾನ ಕಂಪನಿಗಳ ಸಹಕಾರದ ಅಗತ್ಯವಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಇತ್ತ ಪರೀಕ್ಷೆ ರದ್ದಾಗಿ ಜೂನ್ 21ಕ್ಕೆ ಮರು ಪರೀಕ್ಷೆ ಘೋಷಣೆಯಾಗಿರುವುದರಿಂದ ಪ್ರಾಮಾಣಿಕವಾಗಿ ಓದಿದ ವಿದ್ಯಾರ್ಥಿಗಳು ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ.