SUDDIKSHANA KANNADA NEWS/ DAVANAGERE/ DATE:03-03-2025
ಹರಿಯಾಣ: ಹರಿಯಾಣ ಕಾಂಗ್ರೆಸ್ ಕಾರ್ಯಕರ್ತೆ ಕೊಂದಿದ್ದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದು, ಆತ ಸ್ಫೋಟಕ ಮಾಹಿತಿ ಬಾಯ್ಬಿಟ್ಟಿದ್ದಾನೆ.
ರೋಹ್ಟಕ್‌ನ ಬಸ್ ನಿಲ್ದಾಣದ ಬಳಿ ಸೂಟ್‌ಕೇಸ್‌ನಲ್ಲಿ ತುಂಬಿದ್ದ ಹಿಮಾನಿ ಶವ ಪತ್ತೆಯಾದ ಎರಡು ದಿನಗಳ ನಂತರ ಆರೋಪಿ ಸಚಿನ್‌ನನ್ನು ದೆಹಲಿಯಲ್ಲಿ ಬಂಧಿಸಲಾಗಿದೆ. ಆಕೆ ನನ್ನ ಜೊತೆಗೆ ಸಂಬಂಧದಲ್ಲಿದ್ದಳು ಎಂದು ಆರೋಪಿ ಹೇಳಿದ್ದಾನೆ.
ಸಚಿನ್ ಬಂಧನದ ವೇಳೆ ಹಿಮಾನಿ ಅವರ ಮೊಬೈಲ್ ಫೋನ್ ಕೂಡ ಸಚಿನ್ ಬಳಿ ಪತ್ತೆಯಾಗಿತ್ತು. ಹರಿಯಾಣದ ಬಹದ್ದೂರ್‌ಗಢ ನಿವಾಸಿ ಸಚಿನ್ ಎಂಬಾತ, ಹಿಮಾನಿ ತನ್ನಿಂದ ಲಕ್ಷಗಟ್ಟಲೆ ಸುಲಿಗೆ ಮಾಡಿದ್ದು, ಹೆಚ್ಚಿನ ಹಣಕ್ಕೆ ಬೇಡಿಕೆ
ಇಡುತ್ತಿದ್ದಳು ಎಂದು ಪೊಲೀಸರಿಗೆ ತಿಳಿಸಿದ್ದಾನೆ. ಅಲ್ಲದೆ ಆಕೆ ತನ್ನನ್ನು ಬ್ಲಾಕ್ ಮೇಲ್ ಮಾಡುತ್ತಿದ್ದಳು ಎಂದು ಆರೋಪಿಸಿದ್ದಾನೆ.
ನಿರಂತರ ಹಣದ ಬೇಡಿಕೆಯಿಂದ ಹತಾಶೆಗೊಂಡು ರೋಹ್ಟಕ್‌ನಲ್ಲಿರುವ ಹಿಮಾನಿ ನಿವಾಸದಲ್ಲಿ ಹತ್ಯೆಗೈದಿರುವುದಾಗಿ ಸಚಿನ್ ಒಪ್ಪಿಕೊಂಡಿದ್ದಾನೆ. ರೋಹ್ಟಕ್‌ನ ವಿಜಯ್ ನಗರದಲ್ಲಿನ ತನ್ನ ಪೂರ್ವಜರ ಮನೆಯಲ್ಲಿ ವಾಸವಾಗಿದ್ದ ಹಿಮಾನಿ, ಅವರ ಭಾರತ್ ಜೋಡೋ ಯಾತ್ರೆಯ ಸಂದರ್ಭದಲ್ಲಿ ಕಾಂಗ್ರೆಸ್ ಸಂಸದ ರಾಹುಲ್ ಗಾಂಧಿಯೊಂದಿಗೆ ನಡೆದುಕೊಳ್ಳುತ್ತಿರುವ ಚಿತ್ರಗಳು ವೈರಲ್ ಆದ ನಂತರ ಜನಪ್ರಿಯತೆ ಪಡೆದಿದ್ದಳು.
ಹಿಮಾನಿ ಅವರ ಶವ ಪತ್ತೆಯಾಗಿರುವ ಸೂಟ್‌ಕೇಸ್ ಆಕೆಯ ನಿವಾಸದಿಂದ ಬಂದಿತ್ತು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಹಿಮಾನಿಯನ್ನು ಕೊಂದು ಆಕೆಯ ಶವವನ್ನು ಸೂಟ್‌ಕೇಸ್‌ನಲ್ಲಿ ತುಂಬಿ ಬಸ್ ನಿಲ್ದಾಣದಲ್ಲಿ ಬಿಟ್ಟಿದ್ದಾಗಿ
ಸಚಿನ್ ಪೊಲೀಸರಿಗೆ ತಿಳಿಸಿದ್ದಾರೆ.
ಆಕೆಯ ಹಂತಕರನ್ನು ಬಂಧಿಸುವವರೆಗೂ ಹಿಮಾನಿ ಕುಟುಂಬವು ಆಕೆಯ ದೇಹವನ್ನು ಅಂತ್ಯಸಂಸ್ಕಾರ ಮಾಡಲು ನಿರಾಕರಿಸಿತ್ತು. ಶಂಕಿತನ ಬಂಧನದ ನಂತರ, ಹಿಮಾನಿ ಕುಟುಂಬವು ಮರಣದಂಡನೆಗೆ ಒತ್ತಾಯಿಸಿದೆ.
“ಒಬ್ಬ ಆರೋಪಿಯನ್ನು ಬಂಧಿಸಲಾಗಿದೆ, ಮತ್ತು ಇಂದು ಹಿಮಾನಿ ನರ್ವಾಲ್ ಅಂತ್ಯಸಂಸ್ಕಾರ ಮಾಡುತ್ತೇವೆ. ಮಾಧ್ಯಮಗಳಲ್ಲಿ ಸಾಕಷ್ಟು ವದಂತಿಗಳನ್ನು ಹರಡಲಾಗುತ್ತಿದೆ. ನಮಗೆ ನ್ಯಾಯ ಸಿಗುತ್ತದೆ. ಆರೋಪಿಗಳಿಗೆ ಮರಣದಂಡನೆ ವಿಧಿಸಬೇಕು ಎಂದು ಹಿಮಾನಿ ಸಹೋದರ ಜತಿನ್ ಎಎನ್‌ಐಗೆ ತಿಳಿಸಿದ್ದಾರೆ.
ಈ ಹಿಂದೆ, ಹಿಮಾನಿ ಅವರ ತಾಯಿ ಸವಿತಾ ಅವರು ಸುದ್ದಿಗಾರರೊಂದಿಗೆ ಮಾತನಾಡಿ, ಕೊಲೆಯು ಆಂತರಿಕ ಇರಬಹುದು. ಕಾಂಗ್ರೆಸ್‌ನ ಕೆಲವು ನಾಯಕರು ಕಡಿಮೆ ಅವಧಿಯಲ್ಲಿ ಪಕ್ಷದ ಶ್ರೇಣಿಯಲ್ಲಿ ವೇಗವಾಗಿ ಏರುತ್ತಿರುವ ಬಗ್ಗೆ ಅಸೂಯೆ ಹೊಂದಿದ್ದರು. ಆಕೆಯ ಬೆಳವಣಿಗೆಯ ಬಗ್ಗೆ ಹೊಟ್ಟೆಕಿಚ್ಚು ಪಟ್ಟಿದ್ದರು. ಪಕ್ಷದ ಯಾರೇ ಆಗಿರಬಹುದು ಅಥವಾ ಬೇರೆಯವರಾಗಿರಬಹುದು ಎಂದು ಸವಿತಾ ಹೇಳಿದ್ದರು.
